NOVAS.- Esta pasada fin de semana fíxose viral nas redes sociais a foto manipulada duns coxíns da tenda IKEA supostamente estampado a bandeira gay. A manipulación consistiu en ter bautizado o produto co nome de "PUTIN". A estampa non responde exactamente á bandeira gay, xa que ten 8 franxas de cores en lugar de 6 e nin as cores que exhiben nin a orde que manteñen entre elas corresponden á bandeira do arco da vella.
En todo caso, os responsables de IKEA responderon á polémica xerada pola publicación afirmando que a foto é falsa e que nunca tiveron no seu catálogo un produto con ese nome, de feito o coxín que aparece na fotografía xa está descatalogado e durante todo o tempo que estivo á venda o seu nome foi "SKARUM".
A presunta broma foi unha chiscadela dos internautas ao xigante sueco precisamente unha semana despois de que a firma vise obrigada a deixar de distribuír a revista. "Familia IKEA" en Rusia. Segundo a empresa, polo momento IKEA non recibiu ningún aviso por parte das autoridades rusas, pero son conscientes de que o seu contido, onde se mostran "diversos aspectos do fogar independentemente da idade, sexo e orientación sexual", podería considerarse en algúns casos como "propaganda homosexual" e contraver as ríxidas leis homofóbicas implementadas por Putin.
Xa en 2013 IKEA viuse obrigada a substituír na edición rusa da revista IKEA EN VIVO un artigo titulado "Clara e Kirsty" que trataba dunha parella de lesbianas inglesas. Esa decisión xerou críticas á empresa por ceder ante as presións impostas por Rusia. A resposta daquela a través de Ylva Magnusson, portavoz da empresa na sede en Suecia, foi: "Temos dous principios reitores na comunicación que distribuímos desde Ikea. O primeiro é o deseño de interiores na casa. O segundo é cumprir coa lei".
IKEA está considerada unha empresa gay-friendly non só polo trato que lle dá ao feito LGBTI nas súas campañas, senón tamén polo recoñecemento da igualdade de dereitos para todos os seus traballadores independentemente da súa orientación sexual ou identidade de xénero.
Noticias Gayles.tv
Televisión en liña
